Այս դասում կգործարկես քո առաջին Python ֆայլը, հետո կփոխես այն ու կտեսնես նոր արդյունքը։

 

Ինչ կսովորես

Կսովորես տպել տեքստ ու հաշվարկի արդյունք և ֆայլը գործարկել թե՛ VS Code-ից, թե՛ terminal-ից։ Կհասկանաս նաև, թե ինչու ֆայլը փոխելուց հետո պետք է այն պահպանել ու նորից գործարկել։

Սկսելու համար բացիր python-course թղթապանակն ու hello.py ֆայլը, որոնք ստեղծեցիր նախորդ դասում։

 

Առաջին տողը

Ֆայլում գրված է՝

print("Բարև, Python")

print-ը ֆունկցիայի անուն է։ Փակագծերի մեջ տալիս ենք այն, ինչ ուզում ենք տեսնել էկրանին։ Չակերտները ցույց են տալիս, թե որտեղ է տեքստը սկսվում ու որտեղ ավարտվում։

Չակերտներն արդյունքում չեն տպվում։

 

Գործարկիր VS Code-ից

Պահպանիր ֆայլը, հետո խմբագրիչի վերևի աջ անկյունում սեղմիր Run Python File կոճակը։

Run Python File կոճակը VS Code-ում

Այստեղ երևում է, թե որտեղ է Run Python File կոճակը։ Նկարը Microsoft-ի ուղեցույցից է, ու կոդի օրինակն ու interface-ի մանրամասները քո մոտ կարող են տարբեր լինել։ Աղբյուր։

Terminal-ում պետք է տեսնես՝

Բարև, Python

Դրանից առաջ կարող ես տեսնել գործարկման հրամանը, իսկ հետո՝ terminal-ի նոր prompt-ը։ Դրանք քո ծրագիրը չի տպել։

 

Գործարկիր terminal-ից

Terminal-ը պետք է բացված լինի այն թղթապանակում, որտեղ hello.py-ն է։ Նախորդ դասի Get-ChildItem կամ ls հրամանով ստուգիր, որ ֆայլն այնտեղ է։

Windows՝

python hello.py

Եթե նախորդ դասում py-ն էր աշխատում, գրիր py hello.py։

macOS կամ Linux՝

python3 hello.py

Արդյունքը պետք է նույնը լինի։ Հրամանի առաջին մասը ընտրում է Python-ը, իսկ hello.py-ը ասում է, թե որ ֆայլը գործարկել։

ls-ը ցույց է տալիս hello.py-ը, իսկ python3 hello.py-ը տպում է Բարև, Python

Linux terminal։ Նախ ls-ով համոզվում ենք, որ hello.py-ն ընթացիկ թղթապանակում է, հետո գործարկում ենք այն։ Prompt-ի տողերը ծրագիրը չի տպել։ macOS-ում նույնն է, իսկ Windows PowerShell-ում prompt-ն այլ տեսք ունի։

Եթե տեսնում ես can't open file, ստուգիր ֆայլի անունն ու ընթացիկ թղթապանակը։

python3 helo.py հրամանը սխալ անվան պատճառով տալիս է can't open file հաղորդագրություն

Այստեղ ֆայլի անունը սխալ է գրված՝ helo.py։ Python-ը հաղորդագրության մեջ ցույց է տալիս ամբողջ ուղին, որտեղ փնտրել է ֆայլը։

 

Մի քանի տող և հաշվարկ

Ֆայլի կոդը փոխարինիր սրանով՝

print("Այսօրվա ծախսերը")
print(1200 + 300 + 800)
print("դրամ")

Պահպանիր ու նորից գործարկիր։

Այսօրվա ծախսերը
2300
դրամ

Ամեն print() իր արդյունքը տպում է նոր տողում։ Python-ը նախ հաշվում է գումարը, հետո արդյունքը տալիս է print()-ին։

 

Տեքստը և հաշվարկը տարբեր են

Համեմատիր՝

print("2 + 3")
print(2 + 3)

Արդյունքը՝

2 + 3
5

Չակերտների մեջ գրվածը տեքստ է։ Առանց չակերտների թվերն ու +-ը հաշվարկ են։

 

Փոխիր, պահպանիր, գործարկիր

Ծախսերի օրինակում 800-ը դարձրու 1000։ Գործարկելուց առաջ հաշվիր, թե ինչ պետք է ստացվի։

Պահպանիր ֆայլն ու նորից գործարկիր։ Ընդհանուր ծախսը պետք է դառնա 2500։

Terminal-ից գործարկելիս Python-ը կարդում է ֆայլի պահպանված տարբերակը։ Արդեն տպված արդյունքն ինքն իրեն չի փոխվում։ Ծրագիրը պետք է նորից գործարկես։

cat-ը ցույց է տալիս hello.py-ի պարունակությունը։ Առաջին գործարկումը տպում է 2300, իսկ 800-ը 1000 դարձնելուց և պահպանելուց հետո՝ 2500

Linux terminal։ cat-ը ցույց է տալիս, թե ինչ է պահպանված ֆայլում։ 800-ը 1000 դարձնելուց ու պահպանելուց հետո նոր գործարկումը տալիս է 2500։ Վերևի հին արդյունքը նույնն է մնացել։

 

REPL և ֆայլ

REPL-ում >>> նշանից հետո կարող ես արագ փորձել մեկ արտահայտություն։ Ֆայլում պահում ես ամբողջ ծրագիրը, որ հետո նորից գործարկես կամ խմբագրես։

hello.py ֆայլում >>> նշանը չենք գրում։

hello.py ֆայլում գրված է >>> print("Բարև, Python"), և python3 hello.py-ը տալիս է SyntaxError

Եթե REPL-ից տողը պատճենես >>>-ի հետ միասին ու դնես ֆայլում, Python-ը ֆայլը չի կարողանա կարդալ ու ցույց կտա SyntaxError։

 

Ինքնուրույն առաջադրանք

Նույն թղթապանակում ստեղծիր about_me.py ֆայլ։

Ֆայլը պետք է տպի՝

  1. Քո անունը։

  2. Մի նախադասություն այն մասին, թե ինչու ես սովորում Python։

  3. 1500, 700 և 300 թվերի գումարը։

Գրիր երեք print()։ Անունն ու նախադասությունը ինքդ ընտրիր։

Արդյունքը կարող է այսպիսին լինել՝

Անի
Ուզում եմ ավտոմատացնել իմ աշխատանքը։
2500

Հուշում․ առաջին երկու արժեքները տեքստ են, երրորդը՝ հաշվարկ։

 

Լուծման օրինակ

print("Անի")
print("Ուզում եմ ավտոմատացնել իմ աշխատանքը։")
print(1500 + 700 + 300)

Ավարտի չափանիշ․ ֆայլը գործարկվում է երկու ձևով էլ ու տպում է քո ընտրած երկու տողը և 2500։

 

Ստուգիր քեզ

  1. Ի՞նչ կտպի print("1500 + 700")-ը։

  2. Ֆայլը փոխել ես, բայց terminal-ում հին արդյունքն ես տեսնում։ Ի՞նչ կստուգես։

  3. Ֆայլիդ անունը about_me.py է։ Այն python hello.py հրամանո՞վ պետք է գործարկես։

Պատասխաններ․ 1. 1500 + 700 տեքստը։ 2. Պահպանե՞լ եմ փոփոխությունը, ու ճի՞շտ ֆայլն եմ գործարկում։ 3. Ոչ, հրամանում պետք է գրես about_me.py։

Հաջորդ դասում կսովորենք կարդալ առաջին սխալներն ու ուղղել դրանք։